राजस्थानातील जैसलमेर जिल्ह्यातील सध्या कार्यरत असलेला जिल्हा रोजगार अधिकारी शकूर खान याला पाकिस्तानसाठी हेरगिरी केल्याच्या आरोपाखाली अटक करण्यात आली आहे. देशाच्या गुप्तचर यंत्रणांनी त्याच्या मोबाईलमधून गोपनीय कागदपत्रे, संवेदनशील छायाचित्रे व व्हिडीओ मिळवले असून, हे सर्व पाकिस्तानातील एका हँडलरकडे पाठवण्यात आल्याचा संशय आहे.
शकूर खान याच्यावर देशद्रोह, हेरगिरी व राष्ट्रीय सुरक्षेला धोका पोहोचवण्याचे गंभीर आरोप ठेवण्यात आले आहेत. त्याच्या मोबाईलमध्ये पाकिस्तानमधील डझनभर मोबाइल नंबर, कॉल लॉग आणि संदेश आढळले आहेत. विशेष म्हणजे तो पाकिस्तानी दूतावासातील अधिकाऱ्यांशीही संपर्कात होता, अशी माहिती तपास यंत्रणांनी दिली आहे.
काँग्रेस मंत्र्यांचा माजी पीए
शकूर खान याने २००९ ते २०१३ या काळात पोखरणचे आमदार आणि २०१९ ते २०२३ या काळात राजस्थान सरकारमधील कॅबिनेट मंत्री शाले मोहम्मद यांचे खासगी सचिव म्हणून काम पाहिले होते. मंत्र्यांचा कार्यकाळ संपल्यानंतर तो पुन्हा मूळ पदावर – जिल्हा रोजगार अधिकारी म्हणून रुजू झाला होता.
सात वेळा पाकिस्तान दौरा
तपासादरम्यान असेही समोर आले आहे की, शकूर खान याने मागील काही वर्षांत सात वेळा पाकिस्तानला भेट दिली होती. पाकिस्तानच्या सिंध प्रांतातील रहिमयार खान, सक्कर व घोटकी भागातील नागरिकांशी त्याचे घनिष्ठ संबंध होते.
युट्युबर ज्योती मल्होत्राशी संबंध
शकूर खानचे हरियाणातील हिसार येथील युट्युबर ज्योती मल्होत्रा हिच्याशीही घनिष्ठ संबंध होते. ज्योती मल्होत्रा ही देखील याआधी गुप्तचर यंत्रणांच्या रडारवर होती. या संबंधांमुळे हेरगिरीच्या साखळीचा शोध लागण्याची शक्यता वर्तवली जात आहे.
फॉरेन्सिक तपासणी सुरु
शकूरच्या मोबाईलमधून डिलीट केलेला डेटा परत मिळवण्यासाठी तो फॉरेन्सिक लॅबमध्ये पाठवण्यात आला आहे. पोलिस त्याचे बँक खाते, आर्थिक व्यवहार व विदेश दौऱ्यांतील खर्चाचा तपास करत आहेत.
देशभरात गुप्तचर यंत्रणा सतर्क
पहलगाम हल्ल्यानंतर भारतीय सुरक्षा यंत्रणांनी हेरगिरी प्रकरणांवर लक्ष केंद्रित केले असून, नुकतेच नौदल डॉकयार्डमधूनही एका अभियंत्याला अटक करण्यात आली आहे. देशभरातील अनेक सरकारी नोकरदार व युट्युबर्स सध्या तपास यंत्रणांच्या रडारवर आहेत.
संपर्कात रहा | पुढील अपडेटसाठी आमच्या संकेतस्थळाला भेट द्या.MARATHI NEWS.IN – मराठी बातम्याचे एकमेव ठिकाण
